1. Нешличила пикруми Дила нешлис


с. 1 с. 2 с. 3 с. 4
Г1яйша Кьурбанова


Дила дунъяра нура

1. Нешличила пикруми
Дила нешлис
Цунрухъи т1ашризасли,

Неш, х1у гьаларилзулри:

Милигси шичи кьяйда

Набчи гьалакрик1ули.


Неш, х1у чераэс нура

Лерра даим х1ясратли:

Гушси кьац1личи кьяйда

Х1ечирях1 гьуц1рик1ули.


Г1ямрула гьундурани

Ну гьарахърикахъасра,

Гьарахълирра х1ечилра,

Неш, кьакьамарик1уда!


Нуни кайц1уси гьар ганз

Х1елайчил умцулира.

Х1у шишимх1ерик1ахъес

Ну даим къайгъназирра.

1980 д.
Дард мабагьаби х1уни
Нуша шаддирахъули,

Х1ед х1у гьанх1ерикуси,

Нушаб къиян мерличир

Даим камх1ерируси.


Х1ед кьисматли баибси

Х1уницун х1ебукуси,

Агрилизир риадра,

Ламус барес гьалакси,


Гьарахъти пулантира

Гъамтиван бигахъуси,

Г1ях1баркь барес риадли,

Талих1лизи буйг1уси,


Нуша х1евсули лерай,

Х1ули кьяп1х1ебируси,

Нуша х1еделкъи лерай,

Дубша кьякь х1ебихуси,


Нушала дях1 дамкьалли,

Чарх шишимта игуси,

Разили чедаибмад,

Шадли шикад рашуси,


Чат1али жибх1налаван

Нушала гьигь иргъуси,

Нушала кьисмат ах1и

Х1у-рег1си хъумартурси,


Неш, х1ела гьалаб г1урра

Икрамбирулра нуни.

Лерти къайгъначиб имц1а

Дард мабагьаби х1уни!


1981 д.
Дила марзла хъубзара
Бяг1уси маргь бикуси

Минала муракьяна,

Арши миршли иршуси

Абадла аршикьяна,


Мурхь-мурхьли гъарш кайуси

Дила марзла хъубзара,

Релкъаби х1у г1ямрули,

Калаби ара-сагъли!

1982д.
Х1ела къайгъначил сарра
Х1ячма тяп гимиргьиван

Х1уни сарра рих1уси,

Гьар сагал атх1еблизир

Вавалирирхъяхъуси.


Х1ела х1ячмачил сарра,

Неш, ну тазарик1уси.

Берх1иличи вавниван

Жяг1яйчи карц1рируси.


Х1ела къайгъначил сарра

Къугъали х1еррируси,

Алавчар дегъх1елира

Тяп ц1едешван, рилкьуси.


1983 д.

Неш
Ну х1ерак1или г1урра,

Неш, х1у кьакьарак1илрив?

Ну чаррируси гьуйчи

Мурталра х1еррик1улрив?


Жявли ну чаррухъахъес

Кьисматлизи рулгулрив?

Г1ях1ла хабар бурахъес

Г1ях1лази хьаррик1улрив?


Урк1и рях1ятбиахъес

Багьанаби дургулрив?

«Аба!» ибси дев аргъес

Г1урра гьанк1 агарлирив?


1985 д.
Черрерхи, неш
Зайван г1ебалгьуси т1амазизибра,

Неш, х1ела набзи жи даим бикьулра.

Х1ела игьдибарли, х1ела хьулана

Берх1или ванзаван ванарирулра.


Дила гьарбизунас, дила хат1абас,

Неш, х1ела х1ерлизиб кьимат бургулра.

Дигила мурхьдешра т1алабкардешра,

Черрерхи, неш, х1ела кьанни аргъира.


1989 д.
Сен сарри, неш?
Сен сарри, неш ах1ерси,

Дугурби «духъянх1ели»,

Нушачила пикрума

Х1ед гьанк1 бумц1ахъух1ели?


Неш, г1ях1ялдеш дурцулив

Зумали шишимтани?

Пуланталара анц1кьи

Урк1ила дурцух1ели?


Румсахъулрив мурталра

Г1ямрула г1узруртани?

Гарчли бирц1улив х1ела

Улукьутала кьани?


1990 д.
Х1ела мякьлар риасли
Х1ела мякьлар риасли,

Наб ришт1асиван билзан,

Мурили гьанк1ли русес,

Х1яйратес иштях1дулхъан.


Дунъяличир дард-анц1кьи

К1ундац1ибтиван билзан,

Аязти талих1черти

Дурх1ядеш гьаладилзан.


Рахли гьарахърикасли,

Замана чарван билзан.

Манзилла т1имир-химир

Дахъ дархибтиван дилзан.


Анц1кьи шаха мирхъиван

Кьац1дашутиван дилзан,

Г1ямрула кьяч1ик1уни

Ахъес, агь, г1ядаббилзан.


1994 д.
Ц1абилкь биршулри х1уни
Юртла жагаси г1ямзи –

Ц1абилкь биршулри х1уни.

Г1ядатласи, чебях1си

Ихъулри х1янчилизи.


Урк1ила дигиличил

Гьандиркахъулри дусми,

Разити ва пашманти

Садирхъулири бурх1ни.


Чум урк1и анкъиливан

Ванадарири х1уни?

Ламила шалаливан

Чумла дях1 шаладарри?


Чуйна къарцин дусмала

Г1ядаб беркунри х1уни?

Бура, чуйна дубурти

Далуйта делх1ехъунри?


Юх, ах1ен г1ядатласи

Ц1абилкь бухънабаибси,

Х1ела г1ямрула бикьри

Саби ил лех1кахъибси…


1990 д.
Лебталалра нешанас
Дигира дарданира

Нешлацада дирару?

Нешла кьяйда вег1личи

Урх1ла урк1и изуру?


Урк1ец1ира карц1ира

Нешлацада дирару?

Нешливан сабурличил

Чини анц1кьи чекайсу?


«Бируси ах1ен, - иру,-

Нешаналацад рях1му».

Нешли саригу дурх1нас

Лугути лерил г1ямру.


2004 д.

Неш, х1елацад диги чех1едаира

Рахъ белхаагарси набчи цайналра

Г1ясириэсалра рирх1ерируси,

Мучила кьякьцада кумекличира,

Мургьи гибх1еливан, харирируси,
Неш, х1елацад диги чех1едаира

Х1урулг1интази-барх буйг1утазирра.

Х1елацада сабур агни баласра

Хабарли бурибти нартаназибра.


Гьанна нура-рархли неш риаслира,

Х1ечи хъарихъули, неш, ну лералра.

Хъябшли, ухьаличир даим риадра,

Х1ела дигили ну ц1акьрирахъулра.


Ганз кац1ес чархлизиб ц1акь х1ебургадра,

Насих1ятла девли ну г1еррурцулра.

Алавла чебаэс нур ках1елалра,

Ну чериути нур х1езир дургулра.


Адамта сецадла дусми дерк1алра,

Нешличи х1яжатли кавлан мурталра.

Рахъ хамли, бек1 ахъли рашуси нура

Х1ела гьалар г1урра кьукьмусриркулра.


2005 д.
Урк1и ц1умбулхъулигу
Урк1и ц1умбулхъулигу,

Х1ерризасли, неш, х1ечи.

Нурла дишун х1улбазиб

Шявдеш чебиух1ели…


Дец1игулигу, хапли

Гъезби х1яршвандарасли,

Шинкьян ц1удара чурми

Х1яндешли дуцибх1ели…


Дец1ра мурхьбик1улигу,

Х1у рухънараибх1ели,

Мякьлаб гъайбик1утала

Х1уни х1ебикьух1ели…


Чарх зерзербулхъулигу,

Рахли к1ант1ирак1адли,

Гьинталаван кунк кьяшми

Мегьван дек1диубх1ели…


Кьакьара рулхъулрагу,

Рахли гъайкарухъадли,

Х1ела кьисматла бурх1ни

Гьансадиркахъух1ели…

Бура, неш, се барасли,

Шадриэс х1у рируда?

Гьалар кьяйда рахъ кункли,

Се барасли, рашуда?


Х1у жагьриахъес, марли,

Агарагу, неш, ахъри.

Рирасри, дарман баргес,

Дунъя умц1ира нуни.


Ва дила дурхъаси неш
Дудешла дях1 х1егьурси,

Нешла агри беркунси,

Ялкъуздешра агрира,

Дахъ жявли чедуркъубси,


Ва дила г1язизси неш,

Чуйна х1у ц1умрухъунри?

Дец1ла мурхьдешли чуйна

Х1у кьакьарухъахъунри?


Дургъба кьяраиб узи

Чарухъахъес рулгуси,

Чарухъунси узира

Жявли х1яриихьибси.


Ва дила къугъаси неш,

Чуйна г1ядабрухъунри?

Дахъ жапати г1ямрули

Чуйна ц1ухкарарири?


Жагьти рузилизирад

Жявли мях1румриубси,

Рях1муагар кьисматли

Гъамтазирад релт1унси,


Алжанала унзурби

Гьаргли лерай ребк1ибси,

Ва дила дурхъаси неш,

Алжайзир чераргъаби!


2008 д.

Х1ергъис г1ур х1ела балга
Берхъиб кулпетлизирад

Ца х1уцун калунх1ели,

Янила дугурбазир

Риради ц1умрик1ули:


«Агь, узи, лех1кахъили,

Сен илцад гьарахъсири?

Рузила х1ебилшуси

Урк1ила ц1ум х1ергъулрив?


Берх1или нураначил

Х1урхъи гьалах1елзулив?

Чях1-чях1ибала к1ухла,

Узи, чех1ебихулив?


Х1еб далцути хъумала,

Узи, т1ем х1ергъулирив?

Диг1ян дигай дуруси

Бац шалах1ебик1улив?


Чинаври, узи, гьанна

Уктемли х1ериубси.

Жявли чедибдешличил

«Черулхъасра»,- вик1уси.


Паргъатрилив х1ябразив

Узбала къушумличил?

Дунья паргъатбиайчи

Къарауйчив т1ашлирив?


Узи, жаваб бихагу

Чархла диъ диц1улину,

Бура, х1ед кумекличи

Арцес х1ядурлира ну…»


Ва дила г1язиз аба,

Х1ергъис г1ур х1ела балга.

Г1яламличи рахъ карц1си

Бушунну х1ела т1ама…


2008 д.
Чизи урк1и дуриша
Масхара бурух1ели,

Хъяшаван дукарк1уси,

Сагникад рашух1ели,

Г1улухъаван х1улк1уси.

Лебил г1ялам халкьлисра

Кумекбарес х1ядурси,

Къияндикиб мерличи

Хъярхъли музарулхъуси,


Тяништи пулантира

Тухумтази буйг1уси,

Камбик1ути гъамтачи

Карц1и камх1едируси,


Ва дила къугъаси неш,

Х1ялалли х1ерриубси,

Адамдеш ахъли дих1ес

Гъазали карерхурси,


Нушани дурутачи

Жагали лех1рилзуси,

Адабчерли дирахъес

Мурталра г1ерругьуси,


Ва дила жагаси неш,

Жайран кьяйда малх1ямси,

Диги т1алабх1ейрули,

Даим карц1и делг1уси.

Гьанна х1ела гьигьалра

Набчил барх агарх1ели,

Ну чичи лех1ризиша?

Чизи урк1и дуриша?


Неш, х1ела баркьуди чебиулира
Гьар х1ялал адамла баркь-бацлизибра,

Неш, х1ела баркьуди чебиулира.

Лебил нешанала пишбяхънилизиб

Х1ела малх1ямдешра гьанарулира.


Гьар х1ечи мешуси жагаилзулра,

Х1уван гъайбик1ути бахъ бигахъулра.

Дурх1нас нешлайчибра дурхъаси сурат

Лебси ах1ен кьалли, Дунъя умц1алра.

2008 д.

11. Дудешлис
Дудешла х1ябличир
«Х1улби пишдирхъи, – бик1ар, –

Гъайик1ух1ели, х1ела».

«Ил – х1ялалдешла лишан

Саб, – бик1ар, – дубурланна».


«Дях1 х1едамкьахъур, - бик1ар, -

Г1ямрулис ца адамла».

«Ил – асилдешла лишан

Саби, - бик1ар гъабзала».


«Ахъли гъайх1ейк1и, - бик1ар, -

Диуб-дарибтачила».

«Хамдеш агнила лишан

Саб, - бик1ар, - ил адамла».


«Бунагьагарри, - бик1ар, -

Гапх1ейк1и сунечила».

«Ил – адамдешла лишан

Саб, - бик1ар, - багьадурла».


Гьаниркахъули халкьли,

Х1ечила гап иргъулра.

Бек1лил гапла х1ергъули,

Миц1ирли дигахъира.



Дудешлис
Кьанси дуги баайчи,

Ну жуза руч1ух1ели,

«Х1улби сукъурдирарну,

Маруч1ад», – вик1усири.


Дек1си х1янчи бирули,

Рахли ну чераасри,

«Жявли рухънариудну,

Гьигьбати», – вик1усири.


Дуг1ла гъаайик1усиван

Ну лех1х1ерилзусири.

Дигили махик1ахъни

Итх1ели х1ергъусири.


1987 д.
Дудеш гьаниркахъули
Х1ела бузерила гьалак гунзрала

Т1ама иргъулира к1ухлизиб х1ерк1ла.

Чуйнара хъябхъяла х1урк1би ахъили,

Берцахъурри х1уни дурзам мазала.


Тях1уси ц1уэрли дукайзиб сунна

Набчи шят1ахьила биахъу т1ама.

Чуйнара х1унира бахъ иштях1личил

Шят1ахьи бяхъири риш1аси набра.


Х1у гьаниркахъулри или гьанагар

Савли арцантани вич1иръайзивра.

Арцантачив жявли савли алзули,

Чуйнара г1яйдарри х1ункьри мукьрала.


Пурс кьяцнала уктем кабизлизибра,

Дудеш, х1ела сипат гьанарулира.

Чуйнара ахъири тяп илданиван

Шурмар лусентира х1урхъла дукьбира.


К1ап1буцесван ванза дигуси х1ела

Чумра къел чейулра санбазир х1урхъла,

Дигахъира набра тяп х1уни кьяйда

Къел калахъес дила бузерилара.


Х1ела х1и сар, дудеш, набзир дузути
Дунъяла мяг1ни-х1ял дагьес дигули,

Дурх1яла х1улбачил х1ерризурх1ели,

Х1урхъла санбазивси х1у сайри, дудеш,

Г1ямрула чебях1деш наб гьаргбарибси.


Т1ерхьали белкунси хъатлар далхути

Жанагар гежбара ц1уръа мукьарра

Кьарлизир думх1ули чедаибх1ели,

Багьурра: се сабил бузери х1ела.


Къукъу-рямкьли, дудеш, урух1ерили,

Шах-сирисли, забли вамсх1емсахъурли,

Адамдеш дих1ули, г1ямру дерк1ибси,

Аргъира, ну х1ечи риъни мешуси.


1986 д.

Дудешлис
Г1ямрулис ца адамла

Урк1и х1ебакьахъунси,

Х1урулг1инван х1ялалли

Х1урхъазив х1ериубси.
Дудеш, х1унира дунъя

Х1ебалирагу балтни…

Т1имкьли хьанц1а бец1 кьяйда

Изай кьакьаварайчи…


Дуг1ла миц1ираг-булан

Дурх1ниван дигахъуси,

Иш дунъя г1ях1бухъахъес

Г1ях1цад къайгъи барибси.


Х1ела пишдирхъул х1улби

Х1ебалира кьяп1дирни,

Мяшт1си, милигси х1ерли

Бег1 г1ергъи х1еризайчи…


Дургъбала кахти ц1али

Чуйнара ц1ухкарибси,

Хъябхъяли, бурямтани

Лусенван велкахъунси.


Цунси хьураирули,

Гушси кьац1ла ирули,



111. Дурх1ядеш
Дурх1ядеш
Дурх1ядеш – гьайбатдеш, дикилра чина,

Халаахъили рахъ жявли нура.

Арбухили вавнар сих1рула к1ана,

Дуг1аили «х1янчи» дагла хъяшала.


Зурх1ябла ранг касес их1елла гьуц1ра,

Аръа к1ант1личилси вавас уммайра,


Савли берх1иличил гьибандибира

Х1улбала гьаларгу мурталра дила.


Сагнала михик1ла бурчули хала,

Х1ербирух1и карц1ли сурат х1урхъала,

Хапли батбухъунси ришт1ал хъяшала

Хьуланала айгъир баилри чина?


Ахъти зубартачи ахъх1ериубра,

Дунъяла дубличи раъх1ераира,

Сих1рула к1анали лерхул к1ялг1нира

Делши т1ашли ах1ен, марли, гьаннара.


Жавлил к1унбац1ибкъи сих1рула к1ана,

Хьуланала айгъир батли саб г1урра:

Дахъдик1ар къайгънира, дарес х1янчира,

Агь, дурхъал дурх1ядеш, х1ушарав г1урра?



Гьанбирки ришт1ах1ели
Гьанбирки ришт1ах1ели:

Х1яна х1урхъала г1елаб

Ванза агара или.

Ца талих1: х1урхъи-г1елаб

Дунъяла дуб х1ебиъни,

Ванзалантасра набра

Дунъя журугси биъни.

Или х1ебиаллири,

Ц1акьтани ц1акьагарти

Дубличибад тях1ии.


Гьанбиркур: зилантачил

Чидилла бахъал лебал

Буйг1утири тухумти.

Ца талих1: даим г1ялам

Гьалмагъдешлиг1иб умц1ни,

Дунъяла адамтала

Ургар узидеш дузни.

Или х1ебиаллири,

Дунъяла инсантала

Жинс жявлил убабилзи.



Г1ямру дарсх1ейк1ес х1ейрар
- «Х1ера, иш дила х1усбулхъ,

Ришт1ах1ели рашуси,

«Шичи аркьулра!» или

Мурталра реткайхъуси…»


Х1ехарах1ели нуван

Бишт1ати х1язлизиб саб,

Тякбухъи, гербулхъули,

Къулдумег1бик1ули саб.

- Гьаригу, карулхъасра, -

Дурх1начи гъамрирулра.

Рурсби махбик1ули саб:

- Т1ашризи, кариркудра!


- Карикасли, карикас –

Х1ушара кркулрану.

Лерил ибкьдизадалли,

Ахъруцес диишагу…


Къадалабси миъкадли

Гъяйличир ну урцулра!

Агь, дурх1ядеш, дурх1ядеш,

Х1ябра мурити лерра…


«Г1ямру дарсх1ейк1ес х1ейрар…» -

Дурх1ядеш урдалтулра.

Нуни дила х1усбулхъван

Жагьдешра далтас вара?



1У. Студентках1елила белк1аназирад
Чевверхи
Чевверхи, гьинтаван рубшули или

Г1ядатла саламра гес урухк1улра:

Х1ебла далуйтазиб булбулла кьяйда

Багьарбулхъан или аги дигайла.


Къаршиикадлира, бек1 къух1бурцулра,

Х1ерх1еризес х1ела х1улбази х1улба.

Амъур шарализиб алавла кьяйда,

Х1ерлизиб лямц1 бургид или дигайла.


Нурли аръа к1ант1ван рурх1ескаили

Нурли аръа к1ант1ван рурх1ескаили,

Дигайли чум адам белх1ехъунара?

Ламбик1ул берх1или жанай вавниван

Игъбарагар урк1и чум дигубара?
Умутли дуклуми савгъатдарили,

Чум инсан гьайбатли арцахъурара?

Янсавли бяхъибси лагьаван хапли

Чум г1ур ванзаличи бях1ягибара?


Шаддешла мякьлаб дард камбиуб вара?

Ц1умх1едухъи г1ямру мурт калун вара?

Кьисматла масхурти, тяп гьалахили,

Дагьес бек1иубси улас левара?


Вавачи кьяйда карц1ли
Вавачи кьяйда карц1ли

Набчи х1ерилзух1ели,

«Духуси х1ергуд» или

Х1ечир дукарк1ирагу,

Ришт1али лералрира?
Гьархъ улкни анц1дукьи,

Ват1айзи чарбухъунси

Чат1аван уч1ух1ели,

Рахъ халарурхирагу


Х1ехара сарри вара?
Кьанни г1ямрула гьигьли

Ну чераргъахъибх1ели,

Берх1илис сарра или

Бацлис пишряхъирагу,

Игъбарагарри вара?


Къумбала мурдас
Суратуни кьяйда х1ура рилг1яри,

Шурла лесличибси дила шилизир

Х1ед илцад дигути хива ралхули,

Някъличиб лагьаван х1еркарирури.

Масхурти сар или х1ерирхаслира,

Х1у вашуси гьуни алавбирира.

Марли, ну рахъ тахьси уррухъунрара,

Яра х1у къумбала мурда сайрира?


Гьарил х1ерли х1еб х1еху
- Чарухъенгу,- рик1ира,

Цундешли кьац1руцасри,


«Гьарил чарулхъусили

Г1ях1ла хабар х1ебиху», -

Ирули хьалли халкьли,

Рирхаэс х1ерирули.


«Ца х1еръагу», - рик1ира,

Даим дардли лукасри.


«Гьарил х1ерли х1еб х1еху,

Гулвавни пишх1ехъяхъу», -

Ирули хьалли халкьли,

Марбарес дигх1ейгули...



Х1яйрай х1ермалзадгу
Х1яйрай х1ермалзадгу, тилади саби,

Диубтачила г1ур дубмайхъид, вари:

Х1ела урк1илисра барира дяхъи,

Дац1ибну дилара чархла бирк1анти.


Дукарк1ира х1ела ну гьигьаначир,

Дахъ тамашадилзули жагьти урези,

Дунъя-булан умц1ес, наб дигул сархес

Х1у хъяма виркьукъи, рирхх1еуррану.


Х1яйрай х1ермалзадгу, тилади саби,

Виадли хъумарти, лерил диубти:

Х1ехарати жагьдеш гьандиркахъули,

Зерзермадулхъахъад лерил бирк1анти.


Г1ях1дешлис биэсгу
Буч1усила мяг1на х1ергъулра, марли,

Някъбазибси х1янчи саб батбулхъули,

Кариэс, т1ашризес мер х1ебургули,

Сен жургърик1улрара, мугьлат агарли?


Чедихьибти х1улби нургъба ицули,

Кьяп1дариб к1унт1уби цулба усули,

Т1якьярбик1уси бек1 шинк1абирули,

Сен къагъсарулрара, ретсадрулхъули?


Г1ях1дешлис биэсгу нушани аргъни

Бацра Берх1ираван дек1арти диъни,

Берх1или Бац кьяйда шалаирадра,

Цах1нар шаладик1ес нуша х1едирни.



Гъягъяла гъярц1 дякькад даим рашира
Гъягъяла гъярц1 дякькад даим рашира

Ванза мяшт1бирули, х1у ганзик1уси.

Бурул гьар девличи х1яйранририра,

Буун т1ама-булан жагабилзули.


Х1ед лавшардухъалри, занзби луц1ира,

Чучибях1 х1ела х1ер бархьбизур или.

Х1у ужул урунжла шинни ружира,

Милиги ахъасра, муръидилзули.


Хабарла нарт ах1и, г1ядатла виъни,

Дусми ардашалра, балх1ебалира.

Х1ед х1уцун дигули, г1ебшни кьибкьяван,

Гьавухъайчи, сукъур риъни х1ергъира.


Пикри бях1чимайид, цугрикибх1ели,

Итх1еливан рахли кьакьарак1асра,

Риасли, пишрирхъус, сабурбарили,

Шишимта бигубси чарх бирг1яллира.


Г1янддак1агу, урк1и

Г1янддак1агу, урк1и, лерил дардани,

Чизилра дагьахъес дахъ х1ейгулрану:

Лами ц1акьбиалли, хапли шанг кьяйда

Илди чедидерхес асубирарну.
Бец1ла ганжубазиб чубкар мукьарван,

Ц1ибхъмабик1уд, урк1и, дек1 пикрумауб:

Цацах1ели забла мерлаб зурх1ябван,

Хумардешлис г1ергъи шаддеш башарну.


Дячун лигубира дархдалсутину,

Урк1и, жагьх1еливан сагъбии г1урра.

Ва урк1и, батбухъен, туйличиб кьяйда,

Чугурла ги кьяйда зайбик1ен х1ура.



Сагарирус нура

Кьисматла кьяркьдешли зимрирг1яхъули,

Дардли бирк1антала рац1ахъаслира,

Лямц1ла ц1али бигуб мигла кьяливан

Сагарирус нура, шадмайруд вари.
Дубуртазир хъярхъти чях1-заб даралли,

Х1ерк1ра алк1ан хапли, гьалаб бегъубси.

Дегъдешли шях1румарбарибси ванза

Вавначил пишбирхъур, х1улмарк1уд вари.


Х1езицун бугьули дила хам урк1и

Х1езицун бугьули дила хам урк1и,

Ардукьялра дусми, пашмандеш агу;

Хъинжла кьасиличиб лех1си гьинтаван

Т1ут1ули каласра, авара агу.
Дила урк1ила х1ял х1ергъули чуни,

Бугьаллира г1ялам, г1яйибти агу;

Урк1илис паргъатдеш, х1улбас гъапулдеш

Агарли риасра, я ляг1нат агу.


Сен илцад урк1ила ух1на кац1ирил

Аргъес дила ахъри, я гьунар агу.

Белк1лизиб хат1аван къелкарадлира,

Х1у гьалах1елзуси я барх1и агу.


Тамашамайруд
«Жявли х1янриублири» или тамашамайруд,

Гьанк1 бемц1урти дугурби дагьх1едагьурли г1ергъи.


«Х1улбазиб гьалабгъуна амъурдеш агу» майк1уд:

Шишимтира анц1кьира кьадарх1ейубли г1ергъи.


Ну хумарли риънили сабабтаг1ив къяйц1майк1уд:

Разидешла дуклуми х1уни дург1убли г1ергъи.



Ратаба
Ратаба, савлилизир

Сагназир къунзрик1ахъес,

Гулвавнази цункьяшми

Аръаличил ицахъес.


Ратаба, шурми-ургар

Ч1акачи х1еррик1ахъес,

Нукьяйда цунбухъунси

Арцайзи дард бурахъес.


Ратаба, итди х1ебла

Кьар деркьи диаллира,

Атх1еб чардулхъул чат1ни

Нушаб х1едуч1аллира.


Ратаба, заб диалра,

Дуршила дяг1 бухъалра,

Х1у гьаниркахъул дукьба

Наб анц1кьи дихаллира…


Чумра урк1и г1янц1сини

Чумра урк1и г1янц1сини

Урк1и гьаргсила х1ергъиб,

Чумра назикси х1ялра

Лих1би г1янц1та х1едакьиб.
Чумра адабла бег1ти

Х1егътани нясра бариб,

Чумра макрукь пишначил

Мурадличира баиб.


Илис ах1ену гьат1и

Г1ямру г1яндван дархибти,

Чиди манзиллизирра

Суалти камх1ейрути?



Юх, х1ебалира
Масхурта угьадри, ну х1ед рургъира.

Даим пиширхъядри, урузририра.

Урх1ла х1улбазирад диг1яндирули,

Х1елара дилара дигай дих1ира.


Урх1личи х1еръадри, рачарирхира,

Рахли веткахъадри, х1улба умц1ира.

Уркъбяхъуназирад мях1камдирули,

Х1ехарати карц1и сахъли дих1ира.


Х1ела инсапличи пахру бирира,

Урк1ила гьаргдешли х1яйранририра.

Кьадарагар мерлаб талих1 х1ебирни

Х1у гьарахъикайчи, юх, х1ебалира.


Г1яйибтани маркьуд

Г1яйибтани маркьуд, сабурбарили,

Х1у чеэс гьаларван дуц1х1ерухъали,

Шин леркъи къянари бац1кабарили,

Чуйнара х1ед гьала дуц1рухъунрану.
Г1яйибтани маркьуд, рахли делк1асли,

Дила рурхъул ац1кьи ц1уб к1ап1илизи.

Х1ерисес к1унт1уби х1и арахъули,

Чуйнара г1яш-г1яшли ц1умрухъунрану.


Г1яйибтани маркьуд, г1як-г1якбяхъясли,

Инса к1ибях1яндеш чедаибх1ели.

Бемжурси къямц1али бурцух1еливан,

Урк1и бахъ рурц1укъи, дукарк1улрану.


Г1яйибти агара
Х1ерли ах1енх1ели, кумекбирулрив?

Дардли ригубх1ели, х1у пиширхъулрив?

Дила арадешла, дила агила

Къайгъилизи гьанна селис виркулри?


Г1яйибти агара шалг1евухъадра,

Чех1ераибсила г1ердарадлира.

Ит х1ебван х1улк1ули, гьуниваили,

Бусравх1ерик1усра, х1ерх1ейзадлира.


Дек1си ах1ен махра, архис нунилра,

Кумек агарлира г1ямал бирисра.

Уббяхъибси бяг1ли сагал х1еблизиб

Вавах1ебирхъурну, аръа х1екьдешра.


Гьанмабуршидаягу

Гьанмабуршидаягу

Набзи дигайличила:

Хъумартес дигулрану

Игъбарагриличила,

Умули кавлусину,

Х1ебамкьахъалли, шара.
Гьанмабуршидаягу

Аркьул жагьдешличила.

Наб шакдешра агарли,

Г1ебшни ляркьниличила -

Ца манзил х1едилкьангу

Бяг1лира гимиргьира.


Гьанмабуршидаягу

Шадти жагьдешличила,

Х1ехарати карц1айли

Буун талих1личила –

Яни ванал бак1алли,

Пишбирхъурну сиреньра.


Балусирив
«Гьава буг1ярбиублив?» -

Зер-зербулхъи чарх хапли,

Неш кьяйда набчи берх1и

Х1ербик1укъи ванали.


Уктемти дигайлира

Балусирив, дец1 бихни?


«Ванза пулук1бирулив?» -

Ташмишдеш даши рахли,

Дунъя вавааурли,

Рурх1укъи зурх1яб рангли.


Анц1кьили Жагадешра

Балусирив шявбирни?


Сен рархькаралтулра

Итцадра муриси гьанк1 дурх1ях1елла,

Сен рархькаралтулра гьар даим гьанна?

Шалали рурх1уси челябкьла дила,

Сен гъуршкадиубтив рангани х1ела?
Урцули чейути кункти муэрти,

Махлиурх1еливан сен дек1дулхъулра?

Верх1рангла пикруми, ну х1яйралтути,

Урк1илизи гьанна сен къиздашулра?


Х1ярамси баркьуди барх1ебарира,

Риубцад х1ялалли г1ямру дерк1ира.

Ахъри х1ебак1ибси сах1ерхниличи

Дец1рик1ес г1яг1нидеш, марли, лебара?



У. Г1ямруличила пикруми
Бархьдеш баргес умц1ули
Бархьдеш баргес умц1ули,

Г1ямрура харждарира.

Г1ямру аргъес дигули,

Г1урра гьанк1 агарлира.


«Чебях1тази» буйг1ути

Убях1ли уббургулра.

«Ц1акьтани» ц1акь агарти

Бибгух1и, х1якрилзулра.


Х1ялалтала сабурли

Х1яйранра рирахъулра,

Ях1-ламусла бе1тани

Харира рирахъулра.


Адамтазир адамдеш

Калаб или рулгулра.

Адамдеш ц1идик1алли,

Шаддиэсгу г1ямрура…


Х1ялал г1ямру дурк1утас
Г1ях1си дев бурибсилис

Дунъя пешкешбирути,

Ванали х1еръибсилис

Дай урк1и бедлугути,


Насих1ят бурибсилис

Идбаглисван дулгути,

Майали к1ат1дик1ули,

Х1ялал г1ямру дурк1ути,


Мякьлабта дубахъайчи

Урк1ила х1ял иргъути,

Аргъала лералцадх1и

Дигили парчдик1ути,


Зях1матчиби, х1ушаван

Лямц1х1ейк1ар наб зубарти,

Х1ушаван наб улкх1елкан

Заблис г1ергъи зурх1ябти…


Ях1-х1яя дих1ирану умули
Г1инцла бух1наб милкъиван

Цабех1 х1ербирух1ели,

Ну тяп имиалаван,

Рузира х1ерумсули.


Аршилизир вацниван,

Цабех1 хъямбашух1ели,

Варъа бурчул мирхъиван,

Рузира ну х1ясратли.


Ибуси буребаван,

Каласлира ну ч1янк1ли,

Дард агара: ях1-х1яя

Дих1ирану умули.


Адамлис Адам х1ейри
Дубуртазир дахъ хъярхъли,

Диркьаличир паргъатли,

Варачай агурбиван

Даим дях1 дарсдиралри,

Адамлис Адам х1ейри.
Дубрир хъябхъя дирули,

Диркьанир кьар игули,

Бархибх1ели аргъливан

Бархьагардеш биралри,

Адамлис Адам х1ейри.

Г1ямрула къант1дешличила
Урх1ла дях1 дамкьурли чедаибх1ели,

Урк1и кьакьабулхъан: «Се биубара?

Гьанагарси балагь чебак1ибара?

Урк1илизиб дяхъи ц1ибхъбулхъулира?»


- Адамти, мякьлавси цунухъунх1ели,

Дирути датурли, музадулхъена,

Ил х1ушала мякьлав левалцадх1ели,

Тилади сабину, ах1ервирена…


Балас, г1яддабилзни ил вебк1ибх1ели,

Уруздиэс чевкъни, вайбиубх1ели,

Ягъари, г1ямрула къант1дешличила

Ил миц1ирли левай, пикридулхъена …


Чумилра чебаира
Чумилра чебаира:

Урх1ла дец1 иргъутира,

Иргъутала г1ердаэс

Бажардибиркутира.


Чумилра чебаира:

Урх1лис г1ях1 булгутира,

Урх1лис г1ях1 биубх1ели,

Кьакьали улхутира.


Дард аги, г1ях1 бирути

Г1ях1ил х1ербираллири.

Х1ялал г1ямру дурк1ути

Талих1ли бургаллири.


Дец1 аги: х1егъбиубти

Хъулкнас – «хъулкни» иралри,

Г1ялам кьац1ли балхути

Гъубзнас – гъубзни бик1алри …


Вег1ебш, лебал х1ялалти

Х1яли кьяйда биц1ули,

Ват1а усни дуцибти

Вацниван ц1ерхьбик1ули.


Х1яжуртала тайпали
Х1яжуртала тайпали

Чус вахъ х1яжатси адам

Ванзалиувра ургу.
Чус х1яжатли ах1енси

Дях1ла гьалав виалра,

Чех1еили, лайик1у.

Пуланси виаллира,

Чус г1яг1ниси адамлис

Дигарцад ламус биру.


Г1ях1деш биркх1ебиркалли,

Дулек1ла узилисра

Душмайсван ламарт биру.
Язихъ сай
Язихъ сай, шишимта ватх1ейусира,

Адамла дец1 аргъес вирх1ейрусира,

Инсантачи вирхес урухк1усира,

Игьдибарли урк1и бигахъубсира.


Язихъ сай, г1ях1лани хъумартурсира,

«Дерхъабла» тяништи бахъбаибсира,

Гужли машгьуриэс къайгъназивсира,

Бузерила майа х1ебушкубсира.


Язихъ сай, бахъличи даим х1ерсира,

Дигай зубариван деткахъибсира.


«Талих1 сабил лябкьян», - хьулик1усира,

Гьарх1ейзур хьулана вамсахъурсира.



с. 1 с. 2 с. 3 с. 4

скачать файл

Смотрите также: